Ibibida ang husay at ganda ng disenyong Mindanao sa darating na State of the Nation Address (SONA) ngayong Lunes, Hulyo 24.

Tulad noong 2016, iiwasan ang magarbong fashion show sa SONA pero pagbibigyan naman ng mga kongresista at iba pang personalidad ang isang hiling.

“All lady legislators were asked to wear Mindanao-inspired outfit, I hope that will be compliant to the instruction,” ani Rep. Emmeline Villar ng Diwa Partylist.

Pinakita rin ni Agriculture Undersecretary Berna Romulo ang kanyang simpleng Mindanaoang kasuotan na puwede sa SONA.

“Bagobo Tribe by Kaayo… It's very good because we should always support our indigenous tribes, proudly Filipino attired without being lavish,” ani Romulo.

Pinuri rin ng beteranong designer na si Renee Salud ang tagubilin sa SONA.

Bago pa ang SONA, napakita na rin niya at kanyang grupo kay Pangulong Rodrigo Duterte ang koleksyon niyang inspired ng Mindanao tapestry.

“Makabuluhan di ba lalo na sa nangyayari sa Mindanao, at makakatulong pa tayo sa mga naghahabi doon ng fabrics,” ani Salud.

Gagawin din ni Salud ang kasuotan ni Lipa Representative Vilma Santos.

“Inol gawa sa Cotabato Southern Mindanao, gagawin nating parang ballgown pero ang taas, pinana closed neck, pa-sweet parang si ate Vi,” paglalarawan ni Salud.

Bukod kay ate Vi, siya rin ang gagawa ng gown ni Tourism Secretary Wanda Teo.

“Yakan material from Basilan, ang ganda, embroidered ang pang-itaas,” ayon kay Salud.

Susundin din ni Senador Cynthia Villar ang tagubilin na payak na kasuotan sa SONA.

Sang-ayon din si Representative Edcel Lagman sa simpleng kasuotan tulad ng barong para sa mga lalaki pero dapat din aniya pagbigyan ang ibang ideya.

Pero higit pa sa tradisyunal na SONA fashion, mas importanteng kilatisin ang mensahe at nagawa ng Pangulo, ayon kay Lagman.

-- Ulat ni Mario Dumaual, ABS-CBN News