Pinaghimalaan umano ng Poong Itim na Nazareno ang 63 taong gulang na si Nanay Myrna Noveda.

• KBYN: Ilang deboto ibinahagi ang mga kuwento ng himala ng Nazareno

Taong 2020 nang ma-diagnose na may stage 3 endometrial cancer si Noveda.

Para maagapaan ang sakit, kinakailangan nitong maoperahan agad ngunit hirap silang makakuha ng schedule para sa operasyon nito.

"Dinadalangin ko po talaga noon na magkaroon ng schedule si Nanay. Ang takot ko po si baka kumalat na. Hindi na po namin maagapan," kuwento ng kaniyang anak na si Aileen kay Kabayan Noli de Castro.

Halos tatlong buwan ding naghintay ang pamilya Noveda para ma-operahan.

Sa araw ng selebrasyon ng Poong Itim na Nazareno noong 2021, nakatanggap ng tawag si Aileen kahit na nakapatay ang signal sa lugar.

"Bigla pong nagring 'yung phone ko. Noong sinagot ko, 'yung doktor. Ang sabi, 'Kanina pa kita kino-contact.' Nasa Quiapo po kami. Feast day. Pinapatay po kasi ang signal. Ang sabi ng doktor, 'Eh bakit kita nacontact?,'" kuwento niya.

Dahil sa ibayong pagdadasal ng pamilya, matagumpay na nakakuha ng schedule para ma-operahan si Noveda noong Pista ng Nazareno ng 2021.

Sa araw ng operasyon, bitbit nito ang isang larawan ng poon.

"Sabi ko sa Kaniya, 'Ama bahala ka na kung anong gagawin sa akin kasi hindi ko naman alam kung anong sakit ko. Bigyan mo na lang ang mga doktor ng magagaling na kamay. Gabayan Mo sila,'" pagbabahagi ni Noveda.

Naging matagumpay ang kaniyang operasyon at ngayon ay cancer-free na.

Panoorin ang kabuuan ng pagiging deboto ng pamilya Noveda at ang pananalig ng mga Pilipino sa Nazareno sa KBYN: Kaagapay ng Bayan kasama si Kabayan Noli de Castro.