PANOORIN: 'Nagliligawan' na mga buwaya sa Palawan

Cherry Camacho, ABS-CBN News

Posted at Mar 09 2018 12:32 AM | Updated as of Nov 10 2018 02:00 AM

Watch more in iWantv or TFC.tv
Kuha ni Rodel Ronas ng DENR

Usap-usapan ngayon sa social media ang video ng 2 buwaya na tila nagliligawan sa isang ilog sa Balabac, Palawan.

Kuwento ni Rodel Ronas ng Department of Environment and Natural Resources, nakuhanan niya ang 2 buwaya noong Pebrero 28 sa isang ilog sa Barangay Rabor.

Aniya, tila nagliligawan ang mga buwaya dahil parte ito ng kanilang breeding season na nagsisimula sa Enero hanggang Setyembre.

Makikita sa video ang biglaang paglabas ng isang buwaya na sinundan naman ng mas malaking buwaya.

Batay sa ilang mga pag-aaral, nagsta-stalk ang mga lalaking buwaya sa mga babaeng buwaya hanggang sa magtalik ito para dumami.

In-upload ni Ronas ang video nitong Marso 5 na kumakalat ngayon sa social media. Si Ronas ay kasapi ng wildlife monitoring section ng DENR.

Nandoon siya sa lugar nang mamataan ang mga buwaya para magsagawa ng information and education campaign dahil ang ilog ay malapit sa isang paaralan.

Ayon naman sa Palawan Council for Sustainable Development, ang Barangay Rabor ay isa sa kanilang pinag-aaralan na ideklarang crocodile sanctuary sa Palawan dahil sa magkakasunod na sightings ng buwaya sa lugar.

Nagbigay din sila ng babala sa mga residente na maaaring agresibo ang mga buwaya ngayon dahil nasa breeding season.

Kung maaari raw, iwasan na muna ng mga residente na lumapit sa itinuturing na teritoryo ng mga buwaya para maiwasan ang anumang aksidente.

Magsasagawa rin muli ang Palawan Wildlife Rescue and Conservation Center ng surveillance and validation sa lugar sa susunod na linggo.

Sa buong Pilipinas, dito umano sa Palawan ang mayroon pang malaking populasyon ng Crocodylus porosus o saltwater crocodile.

Itinuturing na rin silang endangered species o nanganganib ng maubos kaya pinoportektahan sila ng batas sa ilalim ng Republic Act 9147 o Wildlife Resources Conservation and Protection Act.

Bisitahin ang Patrol.PH para sa iba pang mga balita.