Patuloy ang paglaki ng Maharlika Pilipinas Basketball League matapos ang pagpasok ng Pasig City at lalawigan ng Laguna bilang bagong koponan sa liga.

Nitong Huwebes, pumirma na ng kontrata ang mga kinatawan ng Laguna upang pormal na maging kabilang sa bagong regional basketball league sa bansa na binuo ni Senador Manny Pacquiao.

Nauna nang pumirma ang koponan mula sa Pasig City noong Martes. Aabot na sa 12 ang bilang ng mga team na sasabak sa muling pagbubukas ng torneo.

Malugod na tinaggap nina Commissioner Kenneth Duremdes, Assistant Commissioner Satar Macantal at Operations Head Zaldy Realubit ang pagsali ng Laguna.

Dumalo sa contract signing ang co-team owner ng Laguna na si Sajid Añonuevo, team manager Teresita Alforque, at Vice Mayor Gel Alonte mula sa LGU partner na Biñan City.

Ipinangako ng koponan na bubuo sila ng matibay na lineup para sa liga kung saan igigiya sila ni head coach Alex Angeles.

Inaasahan namang pormal na ring sasali ang San Juan Knights at Team Makati sa kompetisyon sa darating na Sabado o sa susunod na linggo, ayon kay Duremdes.