Watch more in iWantv or TFC.tv

BULALACAO, Oriental Mindoro — Saan man tumingin, iisa lamang ang makikitang tanawin ngayon sa bayan na ito matapos ang paghambalos ng bagyong Ursula noong kapaskuhan.

Mga wasak na bahay, mga natumbang puno, at mga poste sa kalsada ang iniwang perwisyo ng naturang bagyo.

Ang bahay ni Mark Allen Merlin, mga piraso na lamang ang natira.

"Mahirap po sir, wala kaming tulong dito na natanggap... Wala kaming matirahan pero kinakaya naman po namin."

Malaki rin ang pinsala na tinamo ng Bulalacao Community Hospital.

Ang ibang pasyente, inilipat sa ibang ospital kahit 2 hanggang 4 na oras ang layo.

"Iyung natira pong walo, trinansfer po namin sa Roxas District dahil total blackout po kami, wala kaming ilaw... 'Yung iba po sa Calapan dinala sa provincial hospital," ani Bulalacao Community Hospital head nurse Ma. Adela Gonzales.

Ayon kay Bulalacao Mayor Ernilo Villas, halos 90 porsiyento ng mga bahay doon ang nasira at higit 40,000 residente ang apektado ng bagyo.

Paubos na rin ang suplay ng bigas sa kanilang bayan.

"Kailangan namin mga food packs at sa shelter assistance, mga roofing materials, yero, marine plywood," pakiusap ng alkalde.

Sa tindi ng pinsala ng bagyong Ursula, muling idineklara ang state of calamity kahit na nakapagdeklara na noong bagyong Tisoy.

Ayon kay Villas, sinabi sa kaniya ng mga taga electric cooperative na posibleng bago magbagong taon ay magkaroon na ng suplay ng kuryente.