Mga pagguho ng lupa naitala sa Surigao City

ABS-CBN News

Posted at Dec 25 2020 08:25 PM

Mga pagguho ng lupa naitala sa Surigao City 1
Nakaranas ng mga pag-ulan ang Surigao City at mga karatig-lugar dulot ng trough ng low pressure area, na nagdulot ng landslide at pagbaha. Kuha ni Romar Curada.

SURIGAO CITY - Magdamag simula Huwebes na nakaranas ng mga pag-ulan ang lungsod na ito at mga karatig-lugar dulot ng trough ng low pressure area.

Alas dose ng tanghali ngayong Biyernes, gumuho ang bahagi ng lupa sa may Barangay Ipil sa lungsod na ito.

Nagkaroon rin ng landslide sa Purok 9, sa Barangay Cagniog, at Brgy. Washington.

Agad namang nagsagawa ng clearing operation at evacuation sa mga residente malapit sa mga lugar.

Nagsagawa rin ng clearing operations sa may San Francisco-Malimono Provincial Road sa Barangay Oslao na natabunan ng putik dahil sa pagguho ng lupa.

Mga pagguho ng lupa naitala sa Surigao City 2
Nakaranas ng mga pag-ulan ang Surigao City at mga karatig-lugar dulot ng trough ng low pressure area, na nagdulot ng landslide at pagbaha. Kuha ng Surigao City Public Information Office.

Binaha rin ang ilang kalsada at barangay sa lungsod dahil sa walang tigil na ulan.

Nakamonitor ngayon ang Surigao City Disaster Risk and Management Office sa mga posibleng pagbaha pa sa ibang mga barangay, lalo na sa mga low-lying areas.

Inabisuhan naman ang publiko na maging maingat at alerto sa lahat ng oras.

- Ulat ni Lorilly Charmane Awitan