PANABO CITY—Patay ang isang 58-anyos na pastor at supervisor ng Department of Education (DepEd) sa lungsod na ito matapos pagbabarilin ng hindi pa kilalang salarin sa kaniyang minamanehong kotse, Huwebes ng hapon.

Ang biktima ay kinilalang si Babito Manliguez, na senior pastor ng The Harvest Christian Church Community Assembly of God at district supervisor din ng DepEd sa Panabo City.

Sa imbestigasyon ng ng mga pulis, galing sa bahay at papunta na sana si Manliguez sa kanyang trabaho sa DepEd nang pagbabarilin siya ng maraming beses sa loob ng kanyang minamanehong kotse.

Posible umanong inabangan ang biktima sa pasukan ng kanilang sibdivision.

Nakuha rin sa crime scene ang limang basyo ng bala ng hinihinalang kalibre .45.

"Maraming anggulo ang tinitingnan natin. Una ang sa trabaho baka may nakaaway, personal niya, at pagsali nito sa investment scheme, pero patuloy pa tayong nag-iimbestiga" ani Police Lt. Col. Ernesto Gregore.

May suspek na ang Panabo City Police sa krimen.

Hindi naman matanggap ng church member na si Yolanda Castro ang nangyari sa kanilang pastor at naniwalang mistaken identity lamang ang pagpatay sa kanya.

"Dapat sinigurado muna kung iyon ba talaga patayin nila, kasi wala talagang atraso ang pastor namin," ani Castro.—Ulat ni Claire Cornelio, ABS-CBN News