Bahagi ng National Children's Hospital nasunog, halos 200 pasyente inilikas

ABS-CBN News

Posted at Dec 17 2019 10:56 AM | Updated as of Dec 17 2019 07:00 PM

Watch more in iWantTFC

MANILA (2nd UPDATE) — Inilikas ang nasa 190 pasyente ng National Children's Hospital sa Quezon City makaraang masunog ang bahagi nito, Martes ng umaga. 

Sumiklab ang sunog sa ika-7 palapag ng Building 3, na kinaroroonan ng neurology at respiratory wards, dakong alas-10:30 ng umaga, ayon sa mga fire official. 

Dinala sa katapat na fastfood chain sa E. Rodriguez at sa iba pang gusali ang ibang pasyente, kabilang na ang ilan na naka-intubate pa o nakakabit sa respirator kaya kailangan gamitan ng manual resuscitator, ani Dr. Moriel Creencia, hepe ng medical professional staff ng ospital. 

Naantala rin aniya ang ilang medical tests matapos mawalan ng kuryente dahil sa insidente.

Inaalam pa ang sanhi ng sunog na naapula makalipas ang 30 minuto at nag-iwan ng nasa P200,000 halaga ng pinsala. — May ulat nina Zhander Cayabyab at Jervis Manahan, ABS-CBN News 

Bisitahin ang Patrol.PH para sa iba pang mga balita.