MAYNILA -- Nagbabala ang Food and Drug Administration (FDA) laban sa ilang food supplement na pampaputi at pampalaki ng muscle.

Sa advisory ng FDA, hindi rehistrado sa kanila ang Genwhite Glutathione at Musclemeds Amino Decanate kaya hindi sigurado kung epektibo o ligtas itong inumin.

Bukod dito, mahaba rin ang listahan ng FDA sa mga dietary supplement na hindi pinapayagang ibenta sa merkado. Una raw lumabas sa post-marketing surveillance ng FDA na walang certificates of product registration ang mga naturang produkto.

Dahil hindi rehistrado, hindi sumailalim sa evaluation process ang mga naturang produkto kaya hindi isinasantabi ng FDA ang posibilidad na makasama sa kalusugan ng consumer ang iinom ng mga ito.

Nagbabala rin ang FDA ng kaukulang kaso sa mga magbebenta ng mga produktong hindi rehistrado sa kanila.