Watch more News on iWantTFC

Video courtesy of Michael Baylon

MANILA — Hindi bababa sa 8 ang patay matapos tangayin ng rumaragasang baha ang sinasakyan nilang jeep sa Tanay, Rizal nitong Sabado ng gabi.

Karamihan sa mga nasawi ay mga senior citizen at mayroon ding isang bata.

Kuwento ng residenteng si Michael Baylon, sakay ng naturang jeep ang mga senior citizen na kakakuha lang ng kanilang ayuda mula sa Department of Social Welfare and Development (DSWD) sa kanilang bayan.

Dalawang jeep ang nirentahan ng mga biktima mula sa kanilang barangay na dalawang oras ang layo ng biyahe mula sa bayan.

Watch more News on iWantTFC

Mababaw pa umano ang ilog na nasa Barangay Sta. Ines noong pauwi na sila. Ligtas pa ngang nakatawid ang naunang jeep.

Ngunit pagkatapos tumawid ng unang jeep, bigla umanong rumagasa ang tubig sa ilog at natangay nito ang pangalawang jeep.

Agad namang rumesponde ang mga residente ng barangay nang makitang nakatagilid na ang jeep sa gitna ng baha.

Nasa covered court ng barangay ang anim sa mga bangkay, habang dalawa ang nakuha na ng kanilang mga kaanak.

Sa ngayon, may dalawa ring pinaghahanap ang mga awtoridad na tinangay umano ng baha.

— Ulat ni Karen de Guzman, ABS-CBN News