Watch more in iWantv or TFC.tv

Halos taon-taon nang gimmick ng pulisya ang tinaguriang “Santa Cops”, kung saan nagbibihis Santa Claus ang ilan sa kanila bilang pakikiisa sa Christmas season na may kasamang mga bilin para sa seguridad ng publiko.

Pero ngayong 2020, tila may kapareha si Santa Claus nang sabay-sabay ilunsad ng mga pulis ang kampanya sa iba-ibang bayan at lungsod sa Calabarzon o Region IV-A (kahapon/nitong Miyerkules).

Kasabay ng mga “Santa Cops” na nag-ikot sa iba-ibang mall ang kani-kanilang paglalarawan sa banta ng COVID-19.

LOOK: 'Santa Cops' are joined by police in COVID-19 costumes as they make rounds of Calabarzon malls as part of their Christmas informational campaign

(Courtesy: Police Regional Office 4A) pic.twitter.com/30WL33TCq3

— Anjo Bagaoisan (@anjo_bagaoisan) December 9, 2020

May nag-ala-mascot na nagsuot ng mga drowing ng mga coronavirus gaya sa Tagaytay City at sa Quezon province.

Sa Rizal, ginawa pang mukha ng pulis ang virus at tinawag na “Mr. COVID”.

Pinagsama naman ng ibang lugar ang personal protective equipment at mga paglalarawan sa COVID.

Paalala nila ito sa publiko na patuloy na sumunod sa mga health safety protocols gaya ng physical distancing at pagsuot ng protection para hindi kumalat ang sakit.

Namigay din ang mga pulis ng mga leaflet at flyer na may safety tips laban sa mga nambibiktima tuwing ganitong panahon tulad ng shoplifting, pickpocketing at basag-kotse.

Namahagi naman ang iba ng mga face mask. face shield, at pamaypay.

Bukod sa mga mall, nilibot ng mga pulis ang mga supermarket pati mga labas ng simbahan para sa kanilang information campaign.