PatrolPH

Lalaki nahulihan ng laruang baril sa Makati checkpoint

ABS-CBN News

Posted at Dec 08 2020 12:22 PM

Lalaki nahulihan ng laruang baril sa Makati checkpoint 1
Nahulihan ng pekeng baril ang isang lalaking angkas ng motorcycle rider, na ininspeksyion sa isang checkpoint sa Makati City. Retrato mula sa Southern Police District

MAYNILA — Huli ang isang lalaking nakaangkas sa motorsiklo matapos makuhanan ng pekeng baril sa isang checkpoint sa Makati noong Lunes, sabi ng pulisya.

Ayon sa ulat ng Southern Police District (SPD), pinatigil sa Oplan Sita checkpoint sa Metropolitan Avenue, Barangay Tejeros ang motorsiklong may sakay na 2 tao.

Habang hinihingan ng lisensiya at dokumento, napansin umano ng mga pulis na may nakaumbok sa baywang ng angkas na korteng baril kaya pinataas ang damit nito.

Doon umano nakita ang baril na kahawig ng kalibre .45 pero natuklasan kalauan na isa palang pellet gun.

Madalas ang kaso ng panghoholdap sa naturang lugar kaya nagsasagawa ng Oplan Sita sa mga motorcycle rider, ayon sa SPD.

Sa Las Piñas, nahuli noong Lunes ang isang lalaki sa may Marcos Alvarez Avenue, Barangay Talon Singko dahil sa pag-iingat ng baril.

Nakuha sa suspek ang kalibre .22 na baril.

Kakasuhan ang parehong suspek ng illegal possession of firearms and ammunitions.

RELATED VIDEO:

Watch more on iWantTFC

-- Ulat ni Anjo Bagaoisan, ABS-CBN News

Bisitahin ang Patrol.PH para sa iba pang mga balita.