MAYNILA - Timbog ang isang traffic enforcer ng Makati Public Safety Department sa entrapment operation ng ahensya at ng pulis sa Bgy. Bel-Air, Makati City noong Lunes ng gabi.

Kinilala ang enforcer na si Roberto Hojas, 46 anyos.

Sa ulat ng National Capital Region Police Office (NCRPO), nakatanggap ng reklamo ang Public safety department sa umano'y pangingikil ng enforcer sa bahagi ng Buendia Avenue.

LOOK: A Makati City traffic enforcer is arrested by police for alleged extortion of a motorist during an entrapment operation in Buendia Avenue.

(📸: NCRPO) pic.twitter.com/JQqL0w06kQ

— Anjo Bagaoisan (@anjo_bagaoisan) November 25, 2020

Nagpanggap ang isang pulis bilang motorista sa lugar kung saan pinatigil siya ng suspek sa kanto ng Malugay Street dahil sa pagliko roon bago mag-alas-7 ng gabi.

Ayon sa pulisya, sinabihan ng enforcer ang driver na "di mo ba alam 500 yan?" sabay nagturo sa "no right turn" sign sa kalye.

Humingi umano ang enforcer ng P500 para hindi niya isyuhan ng tiket na babayaran ng P1,000 at kumpiskahin ang lisensya ng driver.

Nagbigay naman sa kaniya ang undercover police ng P500 marked money.

Nabawi ang pera sa enforcer nang arestuhin siya pagkatapos ng transaksyon.

Kasong robbery extortion ang kinahaharap ng enforcer.