Traffic enforcer sa Maynila kinaladkad ng SUV ng sinitang driver

ABS-CBN News

Posted at Nov 16 2019 04:17 PM | Updated as of Nov 16 2019 07:37 PM

MAYNILA — Sugatan ang isang traffic enforcer sa Sta. Cruz nang kaladkarin ng sinisita niyang SUV driver nitong Sabado.

Sa inisyal na impormasyon mula sa Manila Public Information Office, kinilala ang biktima na si Adrian Lim, tauhan ng Manila Traffic and Parking Bureau.

Sa kuha ng CCTV bandang alas-9 ng umaga, makikita na nakasabit ang enforcer sa umaandar na Mitsubishi Xpander sa Gelinos Street, malapit sa kanto ng Laong-Laan Street, sa Barangay 342.

Nakabangga pa ng nakaparadang sasakyan ang SUV, na minamaneho ng suspek na nakilalang si Orlando Ricardo Jr.

Nakaharurot paalis ang suspek pero nahuli rin sa Batasan Hills, Quezon City kalaunan. 

Nilapatan ng paunang lunas ng Philippine Red Cross ang enforcer na ngayon ay nagpapagaling na sa Jose R. Reyes Memorial Medical Center.

Watch more in iWant or TFC.tv

Inaalaam pa ng mga awtoridad kung ano ang violation at kung ano ang dahilan ng pagtatalo. 

Nahaharap si Ricardo sa kasong serious physical injury at hit-and-run. 

—Ulat ni Michael Joe Delizo, ABS-CBN News

Bisitahin ang Patrol.PH para sa iba pang mga balita.