MAYNILA (UPDATE) -- Nagdeklara na ng walang pasok ang ilang siyudad at mga unibersidad ngayong Lunes at Martes, Nobyembre 16 at 17, matapos ang pinsala na dulot ng bagyong Ulysses.

Mananatiling walang pasok mula pre-school hanggang senior high school sa Pasig City, ayon kay Mayor Vico Sotto.

Supendido rin ang klase mula pre-school hanggang senior high school sa mga pampublikong paaralan sa Quezon City hanggang Martes.

Sinuspende rin ng lalawigan ng Bulacan ang pasok sa lahat ng antas sa mga pampubliko at pribadong paaralan ngayong Lunes.

Mga unibersidad at paaralan

Nagsuspende na rin ng pasok ang ilang unibersidad sa Metro Manila kasunod ng pananalasa ng Ulysses.

Sinuspende ng Ateneo de Manila University at University of Santo Tomas ang synchronous at asynchronous classes mula Nobyembre 16 hanggang 21.

Nagpatupad naman ng "academic freeze" ang Polytechnic University mula Nobyembre 16 hanggang 27 sa lahat ng paaralan nito sa buong bansa.

Inanunsiyo din ng University of the Philippines na suspendido ang lahat ng synchronous at asynchronous classes, gayundin ang pagsusumite ng mga course requirements, mula Nobyembre 16 hanggang 21.

Sinuspinde na rin ng Far Eastern University High School ang synchronous at asynchronous classes mula Nobyembre 16 hanggang 20.

Samantala, nag-abiso ang De La Salle University sa mga mag-aaral at guro nito na magkakaroon ng palugit sa pagsusumite ng mga requirements.

• Kabataan party-list calls for 'academic break' following typhoons

Suspendido rin lahat ng synchronous classes sa University of the East, kabilang ang Graduate School at College of Law, mula Nobyembre 16 to 21.

Nauna nang sinabi ng Department of the Interior and Local Government (DILG) na maaari pa ring magsuspende ng klase ang mga lokal na pamahalaan kahit kasalukuyang online ang pag-aaral at maraming work-from-home.

• #WalangPasok: DILG says class suspensions still allowed during typhoons

I-refresh ang pahinang ito para sa updates.

Watch more in iWantv or TFC.tv