May pautang ang Social Security System, Government Service Insurance System, at Pag-IBIG Fund sa mga miyembrong nasalanta ng mga nagdaang bagyo.

Ang Pag-IBIG Fund, may P4.4 bilyong inilaan para sa calamity loan dahil sa sunod-sunod na bagyo.

"Kung wala po tayong internet connection o kuryente, puwede pong physical ang pag-avail ng loan, nagcoordinate na po kami sa mga local government unit sa Bicol para makapag-setup po kami ng service desk kung saan puwedeng tanggapin ang loan application" ani Kalin Franco-Garcia, spokesperson ng Pag-IBIG Fund.

Sa SSS, pinag-aaralan kung mag-aalok muli ng calamity loan dahil P28 bilyon na ang nailabas ng ahensiya sa naunang calamity loan dahil sa coronavirus disease (COVID-19) pandemic.

Pero sa ngayon, puwede namang mag-salary loan online sa SSS nang hanggang P40,000.

"Kailangan lang mag-rehistro sa my.sss at 'yun nga pong disbursement account na puwedeng savings account o PayMaya o M Lhuillier puwede pong piliin niyo 'yun at i-enrol n'yo sa inyong my.sss para doon nyo maa-avail ang ating salary loan online," ani SSS Spokesperson Fernan Nicolas.

Nagpapatuloy naman ang P20,000 emergency o calamity loan ng GSIS.

Pero kung mas malaki ang pangangailangan, puwedeng mag-multi purpose loan kung kaya ng suweldo na pagsabayin ang dalawang utang.

"Basta kaya pa ng kaniyang paying capacity basta ang kaniyang net take home pay huwag bababa ng P5,000 kasi 'yan ang GAA requirement 'yan," ani Nora Malubay, Executive Vice President ng GSIS.

Kung walang internet o kuryente sa lugar ng miyembro, maaaring gawing over-the-counter o idaan sa mobile kiosks ang paghain ng loan.

-- Ulat ni Alvin Elchico, ABS-CBN News