BURGOS, Isabela - Patay sa pamamaril ang isang barangay kagawad ng Caliguian sa nasabing bayan, Lunes ng umaga.

Sa inisyal na imbestigasyon, nagbibisikleta umano si Kagawad Leonardo Albano nang pagbabarilin ng hindi pa nakikilalang mga salarin.

Naitakbo pa siya sa ospital, pero idineklarang dead-on-arrival dahil sa tatlong tama ng bala sa mukha at kamay.

“Pag titignan natin yung crime scene, malapit lang yung bumaril kasi malapit lang din yung empty shell. Nakarekober tayo ng tatlong empty shell ng caliber .9mm,” ayon kay Senior Inspector Juan Deodato, hepe ng Burgos Police.

Ikinagulat ng pamilya, malalapit na kaibigan, at kabarangay ang nangyari sa biktima na kilalang matulungin na tao.

“Ang exercise niya tuwing umaga ay magbisikleta, ilang taon na ‘yan. Nakakagulat nga kasi matulungin talaga ‘yan sa tao,” sabi ni Condrado Mondana.

Kinondena naman ni Punong Barangay Tristan Vargas ang pagpatay sa kaniyang tiyuhin na matagal ng pulitiko. Huling termino na ni Albano bilang barangay kagawad at tumatayong chairman ng Committee on Agriculture. Naging konsehal din siya ng bayan sa loob ng tatlong termino.

Hindi naman isinasantabi ng pulisya ang mga anggulo tulad ng personal na alitan at negosyo.

Noong nakaraang linggo lang ay pinagbabaril din sa Burgos ang dating punong barangay ng Divisoria, Aurora na si Pacifico Duque.

Inaalam na ng awtoridad kung konektado ang dalawang insidente ng pamamaril.