MAYNILA — Nawalan ng kuryente ang Barangay Palingon-Tipas sa Taguig City nitong madaling araw ng Huwebes matapos matumba ang 4 na poste dahil sa malakas na hanging dala ng Bagyong Ulysses.

Bandang alas-11:50 ng gabi noong Miyerkoles nang bumagsak ang isang poste sa mga kawad ng kuryente sa F. Manalo Street, base sa kuha ng surveillance camera.

Nakaligtas ang isang lalaking naglalakad sa kalsada noong mga oras na iyon.

Watch more in iWantv or TFC.tv

Naputol ang supply ng kuryente sa lugar bandang ala-1:30 ng madaling araw, anang barangay chairperson na si Jay Mendiola.

Naibalik naman ito alas-6 ng umaga.

Isinara sa mga sasakyan ang magkabilang kanto ng F. Manalo sa Bantayan at Calzada Tipas, pero pinayagang maglakad ang mga tao.

LOOK: A portion of F. Manalo St. in Palingon-Tipas, Taguig City is closed to vehicles after strong winds struck down 4 electric poles in the street around midnight. #UlyssesPH pic.twitter.com/cDsrMDYpJN

— Anjo Bagaoisan (ᜀᜈ᜔ᜇᜒᜌᜓ ᜊᜄᜏᜒᜐᜈ᜔) (@anjo_bagaoisan) November 11, 2020

Bago mag-alas-8 ng umaga, dumating ang mga contractor ng Meralco para ayusin ang mga bumagsak na poste at kawad ng kuryente.

Nagbagsakan din ang ilang mga puno sa mga kalsada sa Taguig bunsod ng Bagyong Ulysses.

Pagsapit ng umaga, umabot ng gutter deep ang baha sa mga parte ng Cayetano Road.

Sa huling ulat ng PAGASA nitong umaga ng Huwebes, humina ang Bagyong Ulysses habang patuloy itong papaalis ng Luzon landmass.

• Typhoon Ulysses weakens, set to exit Luzon

Inaasahang aalis ito sa Philippine area of responsibility ng Biyernes.

RELATED VIDEO:

Watch more in iWantv or TFC.tv

-- Ulat ni Anjo Bagaoisan, ABS-CBN News