TACLOBAN CITY - Dumagsa na ang mga residente ng Tacloban City sa mga sementeryo ilang araw bago ang Undas at anibersaryo ng bagyong Yolanda.

Ilan sa mga residente ang nagpipintura ng mga libingan, habang ang iba naman ay naglilinis sa libingan ng kanilang mga yumaong mahal sa buhay.

Sa Yolanda Mass Grave sa Barangay Basper, may ilang Yolanda survivors rin ang dumalaw sa mga nakalibing.

Napalitan na ang puting pintura sa mga krus na alay sa mga namatay sa kalamidad.

May ilang nagtirik ng kandila at nag-alay ng dasal, habang may ibang naglagay ng lapida.

Samantala, naghahanda na rin ang awtoridad sa Tacloban City para maging mapayapa ang Undas at darating na anibersaryo ng bagyong Yolanda.