Arestado ang dalawang empleyado ng isang emission testing center sa Parañaque dahil sa pag-alok umano ng "sure pass" para sa renewal ng vehicle registration sa Land Transportation Office.

Nagkasa ng entrapment operation ang Anti-Red Tape Authority (ARTA) at Criminal Investigation and Detection Group (CIDG) laban sa mga babaeng suspek noong Biyernes matapos makatanggap ng impormasyon ukol sa umano'y ilegal na gawain.

Napag-alaman ng ARTA na ang modus ng mga suspek ay mag-alok ng emission testing pero kapag nag-inquire na ang aplikante, mag-aalok din sila ng non-appearance LTO vehicle registration renewal service.

Nagpanggap ang operatiba ng mga awtoriadad na magpapa-renew ng rehistro ng motorsiklo at nagbayad ng P1,830. Matapos ang ilang araw, binigay na sa kaniya ang kumpletong renewal documents kahit hindi pa niya nadadala ang motorsiklo sa LTO Parañaque, na isa dapat na requirement.

Nakumpiska ng CIDG sa emission testing center ang nasa 205 na mga processed motor vehicle registration renewal, 15 insurance policy, at 46 official receipts na sinasabing authentic o totoong resibo ng LTO.

Ayon kay ARTA Director General Jeremiah Belgica, iniimbestigahan na ng kanilang ahensiya ang naturang emission testing center at naghain na rin ng show-cause order sa pinuno ng LTO Parañaque para magpaliwanag ukol sa nangyari.

— Ulat ni Jekki Pascual, ABS-CBN News

RELATED VIDEO

Watch more in iWantv or TFC.tv