Inaasahang tataas ang presyo ng mga bulaklak sa Dangwa Market sa Maynila sa mga susunod na araw, habang papalapit ang Undas, sabi ngayong Linggo ng mga nagtitinda.

Ayon sa mga nagtitinda, pagpatak ng Martes (Oktubre 25) hanggang bisperas ng Undas, posibleng tumaas ang presyo ng bulaklak dahil sa madalang na supply na galing sa ibang bansa.

"Madadagdagan ng P20 or P30 kumporme sa dating," ani Nene Pamulaklakin.

"Medyo hirap dating ng bulaklak kasi 'yong galing ibang bansa, mahirap 'yong supply," ani Jhunred Salas.

Watch more News on iWantTFC

Sa ngayon, narito ang presyo ng mga bulaklak sa Dangwa:

• Malaysian mums - P150 kada bundle
• Carnation - P220 kada 10 stem
• Casablanca - P150 kada stem
• Stargazer - P150 kada stem
• Sunflower - P120 kada stem
• Red roses - P250 kada dosena
• White roses - P250 kada dosena
• Ecuadorian roses - P150 kada stem
• Tulips - P90 kada stem

Para sa may mga extra panggastos, mayroon din umanong P550 hanggang P1,000 na flower arrangement na gawa sa orchids at Malaysian mums.

Pagdating naman sa kandila, naglalaro sa P90 hanggang P150 ang 4 na piraso kada pack. Nasa P185 naman ang 20 piraso ng small-size candle.

Naglalaro naman sa P185 hanggang P365 ang kandilang nasa baso.

• Mga sementeryo sa Maynila ininspeksiyon bago mag-Undas

— Ulat ni Reiniel Pawid, ABS-CBN News