MAYNILA (UPDATE) — Tiniyak ng Malacañang ngayong Miyerkoles na mababayaran ng gobyerno ngayong linggo o hanggang sa susunod na linggo ang kahit kahalati ng halos P1-bilyong utang ng PhilHealth sa Philippine Red Cross para sa COVID-19 testing.

Sa isang panayam, sinabi ni Presidential Spokesperson Harry Roque na matibay na basehan ang pagtitiyak ni Pangulong Rodrigo Duterte na mababayaran ang utang ng PhilHealth sa Philippine Red Cross.

“The President has committed to pay. I don’t think there’s any reason for the Red Cross to doubt that the President is committed to pay and because of this, I believe the testing should continue,” sabi ni Roque.

Dahil dito, walang nakikitang dahilan ang Palasyo para hindi agad ibalik sa lalong madaling panahon ng naturang non-government organization ang kanilang serbisyo sa pagbibigay ng COVID-19 swab tests.

• Duterte says will 'look for money' to pay PhilHealth debt to Red Cross

Inihayag din ni Roque na kailangan munang magkaroon ng pagsasaayos ng accounting sa paniningil ng Philippine Red Cross sa PhilHealth para sa swab testing.

“PhilHealth should not pay the same grade for all PCR tests undertaken. There’s a price differential if the machine being used by the testing facility is donated and there’s also a price differential if the testing kits being used were donated,” aniya.

Watch more in iWantv or TFC.tv

Iba dapat ang presyo kapag ang testing ay ginawa gamit ang mga na-donate na gamit at testing machines, bukod pa sa mga ibinigay mismo ng gobyerno, dagdag niya.

Ayon naman kay PhilHealth Spokesperson Rey Baleña, kayang sagutin ng kanilang ahensiya ang pagbabayad ng utang.

"Ang totoo po niyan ay mayroon pong pambayad, mayroon pong pondo ang Philhealth para sa bagay na iyan sapagkat iyan ay kasama sa ating COVID-19 response," ani Baleña sa panayam ng Teleradyo.

Ipinaliwanag ni Baleña na natagalan lang sa pagbabayd dahil nais mag-ingat ni bagong PhilHealth chief Dante Gierran sa paglalabas ng pondo.

"Ang isyu lang po dito, kailangan lang po makatiyak ni Atty. Gierran... na nasa ayos naman ang lahat bago kami tuluyang makapagbayad sa Red Cross," aniya.

"Isa ito sa kaniyang pinag-aralan, ni-review na mga kinontrata," paliwanag ni Baleña.

Ayon din kay Baleña, hindi lang naman Red Cross ang kaakibat nila sa pagbibigay ng COVID-19 testing sa mga Pilipino.

"Sa kasalukuyang mayroon kaming 105 na COVID-19 testing laboratories na partner po natin. Sila po ay DOH licensed at accredited po ng Philhealth. Nababayaran po sila," aniya.

Matatandaang ipinahinto ng Philippine Red Cross noong isang linggo ang pagbibigay ng swab tests nang pumalo sa higit P900 milyon ang hindi pa nababayaran ng gobyerno sa kanila.

• Philippine Red Cross to stop PhilHealth-funded COVID-19 tests due to P930-M gov't debt

Nitong Miyerkoles, sinabi ni Labor Secretary Silvestre Bello III na dahil sa paghinto ng serbisyo ng naturang organisasyon, pumalo na sa higit 6,000 ang mga stranded na mga umuwing overseas Filipino workers sa Metro Manila.

Hindi kasi makauwi sa mga probinsiya ang mga ito dahil sa matagal na paghihintay ng resulta ng swab test.

• 4,000 OFWs stuck in Metro Manila due to suspended Red Cross virus testing: Labor chief

Sinubukan ng ABS-CBN News na kuhanan ng pahayag ang PRC o ang tagapamuno nito na si Sen. Richard Gordon pero wala pa silang tugon. — Ulat ni Joyce Balancio, ABS-CBN News