Dayuhang nagwala umano sa NAIA, arestado

ABS-CBN News

Posted at Oct 17 2019 11:19 PM

MAYNILA—Hinuli ng mga awtoridad ang isang lalaking Iranian matapos umanong magwala ito sa loob ng Ninoy Aquino International Airport (NAIA) Terminal 3 sa Pasay City Huwebes ng hapon.

Ayon kay Bureau of Immigration (BI) spokesperson Dana Sandoval, nagpunta ng airport ang dayuhan para makausap ang kababayan niyang babae na naka-hold dahil sa red alert notice ng International Criminal Police Organization (Interpol).

Dumating ang 31 anyos na babaeng Iranian sa NAIA Terminal 3 pasado ala-1 ng hapon sakay ng Cebu Pacific flight mula Dubai.

Matapos hindi payagan ng airport security ang lalaki, doon na siya nagsisigaw na dahilan sa kaniyang pagkaaresto.

Nakuha rin sa kaniya ang isang maliit na canister na may nakasulat na "flash bang," na napag-alamang lighter pala.

Nakakulong ngayon sa selda ng airport police ang lalaki na nakatakdang i-inquest dahil sa ilang paglabag sa batas.—Ulat ni Dexter Ganibe, ABS-CBN News

Bisitahin ang Patrol.PH para sa iba pang mga balita.