Chavit Singson, tatakbo bilang alkalde

Ria Galiste, ABS-CBN News

Posted at Oct 17 2018 11:14 AM

Naghain na ng kanilang certificate of candidacy sina Luis "Chavit" Singson, bilang alkalde ng bayan ng Narvacan, at Atty. Pablito Sanidad Sr. bilang bise alkalde.

MAYNILA - Humabol sa huling araw ng paghahain ng certificate of candidacy si Narvacan, Ilocos Sur Councilor Luis "Chavit" Singson.

Miyerkoles ng umaga nang maghain si Singson ng kaniyang COC para tumakbo sa pagka-alkalde ng nasabing bayan sa 2019 midterm election.

Makaka-tandem niya si Atty. Pablito Sanidad Sr. na tatakbo bilang bise alkalde.

Hindi ito ang unang pagkakataong nagkasama sa pulitika ang dalawa. Taong 1971 nang tumakbong gubernador si Singson habang bise gubernador naman si Sanidad.

Tatakbo sila sa ilalim ng Bileg party, isang local political party sa lalawigan.

Nitong nakaraang linggo, naghain na rin ng kaniyang COC ang makakalaban sa pulitika ni Singson na si dating mayor Edgardo Zaragoza sa ilalim naman ng PDP-Laban.

Bisitahin ang Patrol.PH para sa iba pang mga balita.