MANILA — Isang pulis ang naaresto sa isang operasyon kontra-droga sa lungsod ng Maynila ngayong Linggo ng umaga.

Ayon sa mga awtoridad, isang intel operative ng PNP Drug Enforcement Group (PDEG) na may ranggong police master sergeant ang suspek.

Hindi na isiniwalat ng pulisya ang pangalan nito.

Nasabat ng mga awtoridad sa naturang operasyon ang dalawang bloke ng hinihinalang shabu na may bigat na dalawang kilo.

Naganap ang nasabing drug bust bandang 2:30 ng madaling araw sa may Quezon Bridge sa Quiapo, ilang oras lang matapos ding makumpiska ng mga pulis ang 600 kilo ng hinihinalang shabu sa isang warehouse sa Tondo.

Nasa kustodiya na ng pulisya ang mga nakumpiskang droga at baril, at isasailalim ang mga ito sa forensic examination.

Patuloy ang pagsisiyasat ng mga awtoridad matapos ang nasabing operasyon.

— Ulat ni Nico Bagsic, ABS-CBN News

MULA SA ARCHIVE

Watch more News on iWantTFC