4 bahay gumuho, mahigit 200 pamilya apektado sa flash flood sa Lucena

ABS-CBN News

Posted at Oct 09 2020 01:49 PM | Updated as of Oct 09 2020 08:35 PM

Watch more in iWantTFC

Mahigit 200 pamilya ang apektado sa pagguho ng mga bahay at estraktura sa mga flash flood sa Lucena, kabisera ng probinsiyang Quezon. 

Ayon kay Quezon Disaster Risk Reduction Management Office chief Janet Gendrano, pitong barangay ang apektado dahil sa tuloy-tuloy na pag-ulan. 

Umabot pa aniya sa ika-2 palapag ng bahay ang tubig, partikular na sa mga nasa low-lying areas. 

Aabot sa 225 pamilya ang inilikas at nananatili sila ngayon sa mga covered court ng barangay hall at eskuwelahan. 

Tuloy-tuloy rin ang pamamahagi ng ayuda sa mga lumikas na pamilya. 

Ayon sa mga awtoridad, hindi bababa sa apat na bahay ang gumuho sa may Dumacaa River, isa sa mga ilog na umapaw dala ng baha. Inabot nang hanggang ika-2 ang pagtaas ng tubig sa lugar pasado alas-1 ng madaling-araw. 

Kabilang sa mga naapektuhan ang mga taga-Barangay Market View. 

Kasama ang 3 tabi-tabing bahay nina Artemio Magtibay at kanyang mga anak sa bumigay. 

Tumigil na ang pagbaha kaninang alas-4 ng madaling-araw at naglilikas sila ng mga gamit pero bandang alas-5 ng umaga ay nagtakbuhan sila dahil pagguho na ang mga bahay. 

Sabi ni Magtibay, noong bagyong Rosing noong 1995 pa sila nakaranas ng mataas na baha. Nakikitira muna sila sa isang katabing simbahan. 

Gumuho rin ang isang katabing tapahan o gawaan ng tinapa. 
Ayon sa may-aring si Danilo Tamayo, nasa 20, 000 pisong halaga ng tinapa ang inanod kanina. 

Inuna rin kasi nilang isalba ang kanilang mga mahal sa buhay na nakatira rin doon. 

Bukod sa Market View, inabot din ng baha ang 6 pang barangay dito sa Lucena. Pero tuluyan na ngang humupa ang tubig dahil tumigil na rin ang ulan. 

-- Ulat ni Anjo Bagaoisan, ABS-CBN News

Bisitahin ang Patrol.PH para sa iba pang mga balita.