CABANATUAN CITY - Arestado ang itinuturong suspek sa pagpatay sa kura paroko ng isang bayan sa Nueva Ecija, Sabado.

Nahuli ang 36 anyos na suspek na si Bernie Limpio sa isang buy-bust operation sa bayan ng Maddela sa Quirino bandang alas-6 ng gabi nitong Biyernes.

Nakumpiskahan umano ang suspek ng 2 pakete ng hinihinalang shabu.

Sa pagsisiyasat ng pulisya, napag-alamang may warrant of arrest si Limpio sa kasong pagpatay kay Fr. Richmond Nilo, kura paroko ng bayan ng Zaragoza.

Noong June 10 ay pinagbabaril ang pari habang siya ay naghahanda para magmisa.

• Pari, patay sa pamamaril sa Nueva Ecija
• Nueva Ecija priest's slay an 'isolated case,' says PNP chief

Batay sa arrest warrant na inisyu ni Angelo Perez ng Cabanatuan City Regional Trial Court Branch 27, 9 ang itinuturong suspek sa pagpatay kay Nilo.

Ayon naman kay Senior Insp. Eric Caezar Rumbaoa, hepe ng PNP Maddela, mag-iisang buwan nang nagtatago sa kaniyang mga kamag-anak sa Barangay Santa Maria sa bayan si Limpio.

"May mga nagsasabi sa amin na nakikita nila dito 'yung taong napanood nila sa TV na suspek dun sa pagpatay sa pari," sabi ni Rumbaoa.

"Nag-verify kami kaya lang ay hindi siya naglalabas. Hanggang may magsumbong sa amin na may nagbebenta ng shabu kaya nag-conduct kami ng operation," dagdag niya.

Sa ngayon, nakapiit si Limpio sa PNP Maddela at mahaharap sa reklamong paglabag sa Comprehensive Dangerous Drugs Act of 2002.

Pagkatapos na maisampa ito ay ipapasakamay siya sa PNP Zaragoza para harapin naman ang kaso tungkol sa pagpatay kay Nilo.