CAUAYAN, Isabela – Daan-daang sako ng uling ang nasabat sa checkpoint sa Barangay Sillawit, Cauayan, Isabela kaninang medaling araw.

Dadalhin umano ito sa mga palengke sa lungsod para ibenta.

Ayon kay Mercelino Espiritu, drayber ng isang sasakyang ginamit upang ibiyahe ang uling, matagal na umano siyang nagde-deliver nito, at hindi niya alam na bawal ang kaniyang ginagawa.

Galing daw siya sa Quirino, at tuwing madaling araw sila bumibiyahe.

Ayon sa Department of Environment and Natural Resources (DENR), mahigpit na ipinagbabawal ang pag-uuling, lalo na kung walang kaukulang papeles.

"Very destructive ang pag-uuling kaysa sa paglo-logging kasi no matter how rampant ang illegal logging, at least natitira ang ugat [ng mga puno]. Sa pag-uuling, lahat sinusunog, basta puwede nang gawing uling," ani Artemio Gavino Jr., environment officer ng Cauayan.

Kapag napatunayang nagkasala ang mga nahuli, mahaharap sila sa kasong paglabag sa Section 77 ng Presidential Decree 705, o Forestry Reform Code of the Philippines.