ILOCOS NORTE - Umabot na sa higit 2,000 ang kaso ng mga nakagat ng aso't pusa sa Ilocos Norte ngayong taon, base sa tala ng Provincial Health Office simula Enero hanggang Hunyo.

Sa animal bite treatment center ng Governor Roque Ablan Sr. Memorial Hospital, hindi bababa sa 10 pasyente ang nagpapabakuna rito bawat araw.

Ayon kay Dr. Victor Bolusan, animal bite physician sa nasabing ospital, karamihan sa kanilang mga pasyente ay mga bata.

"Sa mga magulang, dapat bantayan niyo 'yung mga anak niyo kasi kawawa sila kapat nakagat," aniya.

Kabilang sa mga biktima ay ang isang 1-anyos na bata sa Barangay Tambidao sa bayan ng Bacarra.

Nagtamo ng mga sugat sa mukha ang bata matapos kagatin at kalmutin ng kanilang aso.

Kuwento ng nanay ng biktima, narinig na lang niyang umiiyak ang anak habang siya ay naglilinis.

Nang tingnan kung ano ang nangyari, duguan na ang mukha nito habang katabi ang alagang aso.

Hinala nila, pinaglaruan ng bata ang aso dahil may hawak itong stick.

Agad nilang itinakbo ang bata sa ospital at pinabakunahan ng anti-rabies.

Paalala ni Bolusan, huwag pabayaan kung makagat o makalmot ng alagang hayop.

Dapat hugasan ng sabon at running water ang sugat at pumunta agad sa hospital para magpabakuna.

Dagdag niya, kailangan din na maging responsableng pet owner.

Huwag pabayaang pagala-gala ang mga alagang hayop at dapat pabakunahan ang mga ito laban sa rabies. - ulat ni Grace Alba, ABS-CBN News