Watch more in iWantv or TFC.tv

MAYNILA (UPDATE) - Nabulabog ang ilang taga-Malibay, Pasay City matapos sumulpot ang isang 12-talampakang sawa sa puno ng aratiles sa tabi ng creek sa Brgy. 152 Miyerkules ng gabi.

TINGNAN: Natagapuan ang isang 12-talampakang sawa sa puno ng aratiles sa tabi ng creek sa Malibay, Pasay City

(📸: JR Celon) pic.twitter.com/B06L6tAP5j

— Anjo Bagaoisan (ᜀᜈ᜔ᜇᜒᜌᜓ ᜊᜄᜏᜒᜐᜈ᜔) (@anjo_bagaoisan) September 16, 2020

Kuwento ng residenteng si Reynaldo Flisco, natutulog siya sa labas ng bahay malapit sa puno nang magising siya dahil sa paggalaw ng mga dahon nito pasado alas-9 ng gabi.

Napabangon siya para itawag ang kapitbahay nang makita ang malaking ahas, at sunod na rumesponde ang mga taga-barangay.

"Nabigla po ako, napatayo agad ako. Eh ang laki po ng ahas. Kasinlaki ng braso ng tao," ani Flisco.

Gumamit ng panungkit ang isang driver ng barangay para ibaba ang sawa na mahigpit ang pagkalingkis sa sanga.

Isinara ang bibig nito gamit ang tape at inilagay muna sa sako, bago ibinigay sa mga awtoridad.

Ayon sa punong-barangay na si Miriam Timajo, posibleng nagmula ang sawa sa katabing estero ng Tripa De Gallina, lalo't nangangamoy ang hayop.

Natukoy ang sawa na isang reticulated python. Nagpaalala ang DENR na hindi ito dapat pinapatay o sinasaktan dahil tumutulong itong ma-kontrol ang mga pesteng rodent gaya ng daga.

(📹: Bgy. 152 Zone 16, Pasay City) pic.twitter.com/FsgjqRvkP5

— Anjo Bagaoisan (ᜀᜈ᜔ᜇᜒᜌᜓ ᜊᜄᜏᜒᜐᜈ᜔) (@anjo_bagaoisan) September 17, 2020

"Halatang gutom po ang ahas kaya lumabas sa kanyang lungga. Wala naman kaming lalagyan eh napakadelikado, baka makawala po," sabi ni Timajo.

Itu-turn over sana agad ng barangay ang sawa sa Department of Natural Resources (DENR) pero kinaumagahan na kinuha ito.