Watch more in iWantv or TFC.tv

BAUANG, La Union (UPDATE) - Malakas na hangin at ulan ang nararanasan ng mga residente ng Parian Oeste dito sa bayan, Sabado ng umaga.

Biyernes ng gabi nang mag-umpisang ulanin at makaranas ng malakas na hangin ang mga residente.

Ilan sa kanila ay sinusubukan pang tapalan ang kanilang mga bahay dahil sa tuloy-tuloy ang malakas na hangin.

May ilang puno nang natumba sa mga kalsada habang ang ilang tanim na palay, dumapa na.

Nagsagawa na rin ng forced evacuation sa karamihan ng mga barangay ng San Fernando City.

Pero may ilang mga residente pa rin ang nanatili sa kanilang mga tahanan dahil hindi nila kayang iwan ang kanilang bahay at mga alagang hayop.

Malakas na rin ang hampas ng alon sa dalampasigan ng Taberna. May rumaragasa na ring tubig papunta sa mga bahay.

Naka-standby pa rin ang rescue trucks at equipment ng iba't-ibang ahensya ng gobyerno sakaling kailanganin nang mag-rescue.

Samantala, malakas rin ang hangin at ulang nararanasan sa bayan ng Luna.

Ilang bahay na ang nasira. Nagliliparan na rin ang mga yerong bubong.

Kasalukuyang nasa ilalim ng Signal No. 3 ang lalawigan ng La Union.

PANOORIN: Malakas na ulan at hangin, tuloy tuloy na nararanasan sa Luna, La Union. Ilang bahay, nasira na; mga yerong bubong, nagliliparan | via Justin Aguilar #OmpongPH pic.twitter.com/nYT3nJlk7c

— ABS-CBN News (@ABSCBNNews) September 15, 2018