MAYNILA - Patay ang isang babae sa pagguho ng lupa sa lungsod ng Baguio matapos ang pananalasa ng Bagyong Ompong nitong Sabado ng umaga.

Natabunan umano ng lupa ang hindi pa nakikilalang babae sa landslide sa likod ng isang bahay sa Barangay Bakakeng Central.

Watch more in iWantv or TFC.tv

Inabot ng halos 1 oras bago nakuha ang biktima na sinubukan pang isalba at isinugod pa sa ospital ngunit hindi na umabot ng buhay.

Kasalukuyan namang nasa ospital ang kapatid ng babae na nasaktan sa pagguho ng lupa.

Higit sa 5 pagguho ng lupa na ang naitatala sa Baguio simula Sabado ng umaga dahil sa patuloy na pag-ulan dulot ng Bagyong Ompong (Mangkhut).

Isinara na ang Kennon Road at Marcos Highway dahil sa nasabing mga pagguho ng lupa.

Ang Harrison Road naman sa Baguio ay pansamantalang isinara dahil sa umapaw na tubig. Baha na rin ang ilang bahagi ng City Camp Lagoon sa lungsod.

- ulat ni Micaela Ilao, ABs-CBN News