GUMACA, Quezon - Sugatan ang 5 pulis ng Calauag Municipal Police Station nang maaksidente ang sinasakyang police mobile sa Maharlika Highway sa Barangay Calumanguin, Biyernes ng hapon.

Nangyari ang aksidente malapit sa municipal boundary ng Gumaca at Plaridel kaya rescue team ng Bureau of Fire Protection ng Plaridel ang unang nakaresponde sa mga biktima at agad dinala sa ospital ng Gumaca.

Ayon sa inisyal na imbestigasyon ng Gumaca Municipal Police, nahilo raw ang driver ng police mobile na si Police Cpl. Eric Gregy Estrella dahil sa naramdaman na paglindol na tumama naman sa Burdeos, Quezon.

• Quake rattles Quezon town, felt across Luzon

Nahagip ng police mobile ang kasalubong nito na pampasaherong jeep na minamaneho ni Jervin Garcia Solis bago banggain ang nakaparadang truck sa kabilang bahagi ng kalsada na minamaneho naman ni Arjay Llorente.

Nasa kalahating oras makalipas ang lindol nang mangyari ang aksidente kaya iimbestigahan umano ng Municipal Disaster Risk Reduction and Management Office-Gumaca at pulisya kung dapat isisi sa lindol ang pangyayari.

Hindi naman na kinasuhan ng reckless imprudence resulting in damage to properties ang driver ng police mobile dahil pumayag ang driver ng jeep at truck na makipag-areglo na lamang.