Watch more News on iWantTFC

(UPDATE) Naghahanap ngayon ang Germany ng 600 nurse galing Pilipinas.

Kasama sa mga natanggap na aplikante si Auda Gambala, na lilipad na sa Miyerkoles patungong Germany.

Dalawang taon umanong nurse sa Pilipinas si Gambala at 4 na taon sa Saudi Arabia pero nahikayat siyang mag-Germany dahil sa magandang pasahod.

Base sa kontrata ni Gambala, €2,500 o higit P141,000 ang kaniyang sahod kada buwan.

"'Yon ang basic kasi good as nurse assistant ka doon, then mag-take ka ng exam nila para ma-recognize ka as registered nurse nila and puwede pa mag-increase salary mo," ani Gambala.

Dadaan sa Department of Migrant Workers (DMW) ang pagkuha ng mga nurse, sa ilalim ng Triple Win Project, isang government-to-government agreement na nilagdaan noong 2013.

Kabilang sa basic requirement ay ang 1 taong experience sa mga ospital, rehabilitation center o care institution.

Sa Setyembre 30 ang deadline ng pagpasa ng mga requirement sa central at regional offices ng Philippine Overseas Employment Administration.

Iginiit naman ni Laura Oexle, chargé d'affaires ng German Embassy sa Manila, na walang placement fee na hinihingi sa hiring.

"The program covers the visa application, translation of documents, medical test and also the airfare to Germany. There is also no placement fee," ani Oexle.

Base sa pahayag ng DMW, karamihan sa mga Pinoy nurse na nasa Germany ay napo-promote na sa mas mataas na posisyon habang ang ilan ay muling nag-aaral.

Nasa 6,000 Pinoy nurses ang nagtatrabaho ngayon sa Germany.

Base sa datos ng Filipino Nurses United, lampas 100,000 nurses sa pribadong sektor ang sumasahod ng P537 kada araw sa Metro Manila, mas mababa sa minimum wage ng rehiyon na P570.

Ramdam din ng manpower agencies ang dami ng nurses na nais mangibang bansa at halos 100 aplikante umano ang kanilang natatanggap kada araw.

"Pangunahin po nilang dahilan ay mababa ang sahod tapos sobra sa oras ang trabaho," ani Marilyn Tabagan, liasion officer sa Sharp BH Global Manpower.

Samantala, nangako si House committee on labor chairperson Fidel Nograles na tutugunan ang problema sa pasahod ng mga nurse.

Sa kasalukuyang, malaki ang pinagkaiba ng entry-level salary ng mga nurse sa pampubliko at pribadong ospital. Nasa P35,000 sa mga pampublikong pagamutan habang P12,000 sa pribado, base sa datos ng komite.

Una na ring sinabi ni Pangulong Ferdinand Marcos Jr. na plano niyang taasan ang deployment cap ng Filipino nurses sa labas ng bansa.

• Marcos to increase deployment cap of nurses abroad

FROM THE ARCHIVES

Watch more News on iWantTFC