Isang bangkay na isinilid sa sako ang nakitang palutang-lutang sa dagat sa Barangay Centro Agdao sa Davao City, Miyerkoles.

Nakita ng 2 mangingisda ang nasabing sako bandang alas-11 ng umaga at nang lapitan ay tumambad sa kanila ang tiyan ng isang tao, ayon sa pulisya.

Agad umanong tumawag ng saklolo ang mga mangingisda sa coast guard. Sinamahan sila ng isang kawani nito sa kinaroroonan ng bangkay at hinila ito malapit sa dalampasigan.

Doon nakita ang idinikit na plywood sa sako na may nakasulat na, "Holdaper ako ng panel sa Davao City."

Nasa 35 hanggang 40 anyos ang lalaking biktima, may taas na 5’4 hanggang 5’6 at nakasuot ng blue boxer shorts.

Iniimbestigahan pa ng mga awtoridad ang nasabing krimen.