PatrolPH

Ilang bayan sa Central Luzon, puspusan ang pagpuksa sa dengue

Anjo Bagaoisan, ABS-CBN News

Posted at Aug 21 2022 05:26 PM

Courtesy: Barangay Minuyan, Norzagaray, Bulacan
Courtesy: Barangay Minuyan, Norzagaray, Bulacan


MANILA — Puspusan ang mga aktibidad sa ilang bayan sa Central Luzon para puksain ang dengue.

Naitala sa rehiyon ang pinakamaraming kaso sa Pilipinas ng sakit na dala ng lamok.

May 18,664 na kaso ng dengue na naiulat sa Region 3 mula Enero 1 hanggang Hulyo 30 o 18 porsyento ng kabuuang bilang ng mga kaso sa bansa.

Nagbara-barangay sa mga may kaso ng dengue ang mga tauhan ng municipal health office ng San Miguel, Bulacan para sa kanilang awareness campaign.

Namahagi sila ng mga pamplet na may impormasyon tungkol sa pag-iwas sa sakit.

Nagsagawa rin sila ng mga programa para ipaalala sa publiko ang pagsagawa ng 4-S strategy ng Department of Health laban sa dengue.

Nagpaikot naman sa mga bahay para sa disinfection ang Barangay Minuyan sa Norzagaray.

Nasa Bulacan ang may pinakamaraming kaso ng dengue sa rehiyon.

Sa Cabanatuan City, Nueva Ecija naman, nag-fogging sa iba-ibang lugar sa mga komunidad.

Pinuntahan ngayong weekend ang mga paaralan sa lungsod na humiling ng tulong laban sa dengue bilang paghahanda sa balik-eskuwela sa Lunes.

May dengue misting din sa mga nakapagtala ng dengue sa Tarlac City.

Sa huling tala ng Department of Health (DOH), may 23,440 nang naitalang dengue cases noong Hulyo.

Lumagpas na sa epidemic threshold ang dengue sa 9 sa 17 rehiyon ng bansa sa nakaraang 4 na linggo.

Umabot na rin sa 102,619 ang mga kaso ng dengue mula Enero hanggang katapusan ng Hulyo—higit doble sa mga kaso noong panahong iyon ng 2021.

Kasunod ng Central Luzon, naitala rin sa nakaraang 7 buwan ang mataas na mga kaso sa Central Visayas (10,034) at National Capital Region (8,870).

Sinabi ni DOH officer-in-charge Maria Rosario Vergeire noong Biyernes na bukod sa paglilinis at disinfection, pinagsagawa rin ng DOH ng preventive measures ang mga sangay nito.

Nagbaba na rin aniya ng dagdag na pondo sa mga ospital bilang paghahanda.

Umabot kasi sa 18,208 o 78 percent ng mga kaso ng dengue ang naospital.

Paalala ni Vergeire na dumiretso na sa health center o lumapit sa doktor ang makararanas ng lagnat ng 2 araw o higit pa.

“Seek early consult. Kasi kung maaagapan natin ang sintomas ng dengue, hindi po kailangan maospital ang isang taong may dengue,” aniya.

Ayon kay Vergeire, hinihintay pa ng DOH na siyasatin ng Health Technology Assessment Council ang mga maaaring gamiting bakuna kontra dengue, kabilang ang dengvaxia.

Pero nagsagawa na rin ng sariling pagsusuri ang DOH kasama ang mga eksperto sa iba-ibang bakuna.

BALIKAN:

Watch more News on iWantTFC
Bisitahin ang Patrol.PH para sa iba pang mga balita.