Watch more in iWantv or TFC.tv

MAYNILA - Nangangamba ngayon ang ilang mga negosyante sa Ermita, Maynila na tuluyan silang malugi sakaling palawigin pa ang enhanced community quarantine sa Metro Manila.

Ayon sa mga may-ari ng mga karinderya, lugmok na sila ngayon dahil halos wala nang kitain sa pagtitinda.

Apektado ang hilera ng mga karinderya dahil walang pasok ngayong ECQ ang mga suki nilang nag-oopisina maging sa unibersidad na malapit sa lugar.

May ilan na nagsara na rin dahil hindi na nila kaya ang gastos.

Kung dati na kumikita sila ng P12,000 hanggang P15,000 kada araw, nasa P6,000 hanggang P7,000 na lang ang arawan nila na madalas ay kulang pa sa kanilang puhunan.

Mahal na rin anila ang bilihin ngayon kaya kailangang magbawas ng lutuin, dagdag pa diyan ang gastos sa kuryente, tubig, gasul, renta at pasahod sa kanilang mga tauhan kaya hirap na rin sila sa gastusin.

Nais ng mga nagtitinda sa lugar at mga may-ari ng karinderya na hindi na ma-extend pa ang ECQ sa Metro Manila.

- TeleRadyo 19 Agosto 2021