MAYNILA (UPDATE) - Anim ang naiulat na namatay matapos masunog ang isang apat na palapag na paupahan sa Tondo, Maynila nitong hapon ng Martes.

Nasawi sa insidente ang isang 14-anyos na babae at limang miyembro ng isang pamilya.

Ayon kay Senior Supt. Jonas Silvano, District Director ng Bureau of Fire Protection Manila, problema sa kuryente ang posibleng sanhi ng sunog.

Mabilis na kumalat ang apoy kaya hindi na nagawang makababa sa gusali ng mga biktima.

May fire exit naman umano ang gusali pero nasa ikatlong palapag pa at walang hagdan pababa.

Wala rin umanong permit ang paupahan.

Umabot ang sunog sa ikalawang alarma na nagsimula 1:50 ng hapon at idineklarang under control bandang alas-3 ng hapon.

May 70 pamilya ang nawalan ng tirahan sa sunog at kasalukuyang tumutuloy sa isang covered court. - Ulat ni Zyann Ambrosio, ABS-CBN News