CAGAYAN, Philippines – Patay sa pamamaril si Bise Alkalde Aaron Sampaga ng Pamplona, Cagayan Biyernes ng gabi.

Ayon sa Philippine National Police, Pamplona, nagpapahangin umano ang bise alkalde sa tabing ilog sa Barangay Masi nang biglang pinagbabaril ito at ang kasamahan ng di pa nakikilalang suspek. Idineklarang dead on arrival si Sampaga sa ospital, habang ang kanyang kasamahan ay nagtamo ng mga sugat at kasalukuyang nagpapagaling sa ospital.

Nakuha ang anim na basyo ng bala ng M16 na riple at dalawang basyo ng bala ng caliber .45 na baril sa lugar kung saan naganap ang pamamaril.

Patuloy pa ang imbestigasyon ng pulis kaugnay sa motibo sa likod ng pamamaril at pagkakakilanlan ng suspek.