Construction worker, timbog sa Maynila matapos sumaksak ng kapwa customer sa videoke bar dahil umano sa nawawalang P800 pic.twitter.com/jB1y1mR5px

— Anjo Bagaoisan (@anjo_bagaoisan) July 29, 2017

MANILA - Patay ang isang lalaking umiinom sa isang videoke bar matapos saksakin ng kapwa kustomer na nawalan ng P800 sa Malate, Maynila Sabado ng gabi.

Namatay ang 32-anyos na biktimang si Doimevar Oric mula sa tinamong 3 saksak sa likod.

Kuwento ni "Samantha" na nagtatrabaho sa bar, nagsimula ang gulo ng igiit ng suspek na si Gerry Nacario, 26, na nawalan siya ng P800 makaraang gumamit ng CR sa bar.

Sinabi umano ni Nacario kay Samantha na posibleng kinuha ito ng isa sa 2 taong nakasabay umano niya sa palikuran.

Ayon naman sa katiwala ng bar, may isa pang customer na nagsabing nawalan din ng pera kaya sinabihan niyang mag-usap na lang sila ng suspek.

Pero umalis si Nacario sa bar at bumalik na may dalang kutsilyo, saka biglang pinagsasaksak si Oric, na kasisimula lang uminom noon at hindi namalayan ang pagdating ng suspek.

Isinugod ang biktima sa Philippine General Hospital pero hindi na umabot doon nang buhay.

Tumakas si Nacario pero nahuli rin kinalaunan ilang metro ang layo mula sa bar.

Hindi na narekober ang nawawalang pera.

Regular na kustomer su Nacario sa bar tuwing Sabado, ayon sa mga nagtatrabaho roon.

Inamin ng suspek na si Gerry Nacario na nanaksak siya sa galit sa kumuha ng pera niya, pero nagsisi na nadamay ang biktima pic.twitter.com/BLnE2mNQwK

— Anjo Bagaoisan (@anjo_bagaoisan) July 29, 2017

Napaiyak naman ang suspek nang aminin ang ginawa. Aniya, nagsisisi siya na may nadamay pang inosenteng tao at napatay dahil sa kanyang galit.

Haharapin ni Nacario ang kasong murder.