Patay ang isang lalaki habang sugatan naman ang kaniyang kapwa motorcycle rider matapos magsalpukan ang mga minamaneho nilang motorsiklo sa Cabatuan, Iloilo, sabi ngayong Martes ng pulisya.

Kinilala ng mga awtoridad ang nasawi bilang si Reynaldo Madirada, 30, habang nasugatan naman si Bernald Armada, 21.

Ayon sa imbestigasyon, patungo sa bayan ng Santa Barbara, Iloilo ang motorsiklong minamaneho ni Armada nang makasalubong nito ang motorsiklo ni Madirada noong gabi ng Linggo.

Sa lakas ng banggaan ay tumilapon sa kalsada ang 2 rider.

Agad rumesponde ang mga local disaster official ng Cabatuan at dinala sa ospital ang 2 pero kalauna'y binawian din ng buhay si Madirada.

Napag-alaman ng mga awtoridad na parehong nakainom ng alak at walang suot na helmet ang mga motorcycle rider nang mangyari ang aksidente.

• Paalala: Pagmamaneho nang lasing labag sa batas

Patuloy namang nagpapagaling sa ospital si Armada.

— Ulat ni Rolen Escaniel

FROM THE ARCHIVES

Watch more in iWantv or TFC.tv