MANILA — Bumisita si National Security Adviser Dr. Clarita Carlos sa national headquarters ng Philippine Coast Guard (PCG) sa Maynila ngayong Lunes.

Sa kanyang pagbisita, binigyan si Carlos arrival honors ng PCG sa pangunguna ni Commandant Adm. Artemio Abu at iba pang opisyal at personnel ng ahensya.

Pagkatapos ng arrival honors, diretso sa pagpupulong ang National Security Council at Philippine Coast Guard.

Sa kanilang pagpupulong, sinabi ni Carlos na wala pa siyang ibinibigay na marching orders partikular na sa pagpapatrolya sa West Philippine Sea.

Sa ngayon, patuloy pa raw ang koordinasyon nila sa PCG.

Ayon naman kay PCG spokesperson Cmdr. Armand Balilo, binigyan nila ng briefing si Carlos hinggil sa kanilang mga trabaho at tungkulin sa pagpapatrolya sa West Philippine Sea at iba pang mga karagatan sa Pilipinas.

Sinabi rin ni Balilo na ipinabatid din nila kay Carlos ang pangangailangan ng PCG sa mga karagdagang patrol vessels, assets, at tauhan para mas mapaigting ang pagbabantay sa mga mga karagatan sa bansa.

Pagkatapos ng higit 2 oras na pulong, umakyat at nag-ikot sa barkong BRP Teresa Magbanua si Carlos.

Nakatakdang magpulong ulit sa susunod na linggo ang National Security Council at PCG.

—Ulat ni Raya Capulong, ABS-CBN News

KAUGNAY NA VIDEO:

Watch more News on iWantTFC