TAGUIG CITY (UPDATE) — Iniutos ni National Capital Region Police Office (NCRPO) chief PBGeneral Jose Melencio Nartatez Jr ang imbestigasyon at pagtugis 5 pulis Maynila na sangkot sa umano’y robbery at extortion sa isang computer shop sa Sampaloc.

Watch more News on iWantTFC

Sumuko na sa Presidential Anti-Organized Crime Commission o PAOCC ang tatlo sa limang pulis, Lunes ng hapon.

Ayon kay PAOCC Usec. Gilbert Cruz nakipag-ugnayan ang mga magulang ng tatlong pulis sa kanya hinggil sa pagsuko nito.

Nagpahayag ng pagsuko ang tatlo dahil nais aniyang ipaliwanag ang kanilang panig at nagaalala na rin sila sa kanilang pamilya.

Sinabi rin ni Cruz na nagpahayag na rin na susuko ang dalawa pang pulis at hinihintay na nila ngayon.

Nakatakda namang iturnover ni Cruz kay PNP Chief General Benjamin Acorda Jr. ang mga sumukong pulis.

Lunes ng umaga sa flag raising ceremony sa Camp Bagong Diwa, Taguig sinabi ni Nartatez na bukod sa 5, may 2 pang mababawas sa hanay ng pulis sa NCRPO.

Isang pulis NCR umano ang nasangkot sa isang gulo sa Las Piñas at isang naka leave na pulis ang may reklamong robbery sa Dagupan.

“Nabawasan po ng pito, but we will not stop cleansing our ranks kasi po yan ang nagpapa pangit ng imahe ng philippine national police. And of course we are trying to, yung magandang serbisyo sa ating community.” sabi ni Nartatez.

Hindi umano maintindihan ni Nartatez bakit kailangan pang masangkot ng mga pulis sa katiwalian gayong sapat na ang suweldo ng mga ito.

“I’m wondering why these 7 bad eggs ay gagawa pa ng ganung mga shenanigans. The patrolman’s gross pay today is how much, close to P38,000 gross.”

Dahil dito ipinahinto na niya ang suweldo at benepisyo ng mga ito at pinasasampahan na ng kaso.

“Make sure to get the report and cut pay and allowances na ngayon. Nagbigay na ako ng instruction perhaps nagawa na ngayon. R1 and R7, ensure that administrative charges, kailangan papunta na sa atin.”

- may ulat ni Raya Capulong, ABS-CBN News