Dalawang crew ang sugatan sa nasunog na barko sa Barangay Punta Engaño, Lapu-Lapu City, Cebu, Sabado ng madaling-araw.

Sa inisyal na imbestigasyon ng Lapu-Lapu City Fire Department, nakaangkla umano ang M/V Trans Asia 1 na pinagmamay-ari ng Trans Asia Shipping Lines Inc. dahil itinakda itong i-repair.

Tumalon umano ang mga nakabantay na 6 na crew at isang security guard sa dagat nang magsimula ang apoy.

Dinala sa ospital ang dalawang sugatang nagtamo ng first-degree burn. Hirap umano sila sa paghinga dahil sa usok.

Ayon kay Fire Senior Inspector Diomed Alburo, nahirapan sila sa pag-rescue dahil nasa 100 metro ang kinaroroonan ng barko mula sa pampang.

Iniimbestigahan pa ng Bureau of Fire Protection ang sanhi at kabuuang halaga ng pinsala ng sunog. Idineklara itong fire-out alas 5:45 ng umaga ngayong Sabado.

Nagsasagawa na rin ng inspeksiyon ang Philippine Coast Guard sa posibleng oil spill.

Nasadsad ang barko noong Disyembre 2021 dahil sa bagyong Odette, sabi ni Alburo. — Ulat ni RC Dalaguit de Vela