Pulis suspek sa pagpatay sa babaeng empleyado ng Pangasinan provincial gov't

Elaine Fulgencio, ABS-CBN News

Posted at Jul 13 2020 04:44 PM

SAN CARLOS CITY, Pangasinan — Timbog ang isang pulis dito nitong Lunes matapos lumabas sa imbestigasyong siya ang suspek sa pagpatay sa isang babaeng empleyado ng lalawigan. 

Kinilala ang suspek na si Patrolman Frankilino Germono, 26, sa Pangasinan First Provincial Mobile Force Company na naka-duty bilang checkpoint officer sa bayan ng Mangatarem.

Hulyo 7 nang barilin sa ulo si Reynalyn Aquino, 23, at empleyado ng Pangasinan Provincial Social Welfare Office, bago pumasok sa trabaho.

Nangyari ang pamamaril sa Sitio Longos, Barangay Cacaritan sa San Carlos City. 

TESTIGO

Natunton ang gunman sa tulong ng mga testigo, ayon sa pulisya.

"Siya ay ating pinuntahan doon sa kaniyang post kung saan siya nagdu-duty at from there na-take in custody siya at nag-cooperate naman siya," ani Police Col. Redrico Maranan, provincial director ng Pangasinan police. 

Tumanggi nang magbigay ng pahayag si Germono, pero isinuko niya ang ginamit na motorsiklo, cellphone, damit, at service pistol na isasailalim sa ballistics examination. 

Napag-alaman din na may relasyon ang suspek sa biktima na tinitingnang motibo sa krimen. 

Sinampahan na ng kasong murder ang pulis at posibleng maharap din sa kasong administratibo at matanggal sa serbisyo.

Tumanggi munang magpahayag ang kaanak ng biktima.

Bisitahin ang Patrol.PH para sa iba pang mga balita.