FLASH REPORT: Sunog sa Brgy. Villamor, Pasay, itinaas na sa ikaapat na alarma | ulat ni @RadyoPatrol44 pic.twitter.com/hV1U84w1WZ

— DZMM TeleRadyo (@DZMMTeleRadyo) July 6, 2019

MAYNILA - Sumiklab nitong Sabado ang isang sunog sa residential area sa Barangay Villamor sa Pasay City.

Ayon sa Bureau of Fire Protection (BFP) nagsimula ang sunog bandang alas 2:00 ng hapon.

Mabilis kumalat ang apoy dahil gawa sa light materials ang mga bahay na nadamay. Nahirapan naman ang mga bombero na maapula agad ito dahil sira ang pinakamalapit na fire hydrant sa lugar.

Umabot ang sunog sa ika-apat na alarma sa laki ng apoy nang higit 10 bahay na ang natupok.

Matapos ang higit sa isang oras, idineklara ng BFP na kontrolado na ang apoy bandang alas 3:17 ng hapon.

Watch more in iWantv or TFC.tv

Wala namang naitala na nasugatan sa insidente.

Isa sa mga nasunugan na si Brent Uy ay survivor ng Bagyong Yolanda na nanalasa sa Visayas noong 2013. Aniya, hindi niya inakalang makararanas ulit ng trahedya sa Metro Manila.

Nagsasagawa na ang lokal na pamahalaan at BFP ng mas malalim na imbestigasyon.

-- May ulat nina Henry Atuelan at Bianca Dava, ABS-CBN News