MANDAUE (3rd UPDATE) -- Nasunog ang tahanan ng nasa 1,200 pamilya sa lungsod na ito sa lalawigan ng Cebu, Huwebes ng madaling-araw.

Dakong ala-1 ng umaga nagsimula ang sunog sa Sitio Basubas at Maharlika sa Barangay Tipolo, ayon sa Bureau of Fire Protection.

Naapektuhan ng apoy ang hindi bababa sa 500 bahay, gayundin ang 5 classroom sa Tipolo National High School, dahilan para suspendihin ang klase doon.

Naiulat na nawawala ang 3 bata at pinangambahang na-trap sa kanilang nasusunog na bahay. Pero nahanap din sila kinalaunan at nadiskubreng sumama sa kapitbahay dahil sa pagmamadali.

Umabot ang sunog sa Task Force Bravo, na nangangahulugang kinailangan ng mga awtoridad ng tulong mula sa mga bombero ng mga karatig-lugar tulad ng Lapu-Lapu City, Cordova, Consolcion, at Talisay City.

Naapula ang apoy pasado alas-9 ng umaga.

Inaalam pa ng mga awtoridad ang sanhi ng sunog at halaga ng iniwan nitong pinsala.