5 istasyon ng Manila-Clark Railway minarkahan

ABS-CBN News

Posted at Jun 26 2017 09:53 AM | Updated as of Jun 26 2017 10:26 PM

Transportation (DOTR) Secretary Art Tugade (R) shakes hands with Japanese Ambassador Kazuhide Ishikawa (C) and JICA Chief Representative Susumo Ito, during the railway station marking ceremonies at the Tutuban Train station in Manila on Monday. Jonathan Cellona, ABS-CBN News

MANILA - Minarkahan ng Department of Transportation Lunes ang lugar na pagtatayuan ng 5 sa 17 istasyon ng Manila-Clark Railway project na pagdudugtungin ang kabisera ng bansa at Central Luzon.

Mula 2 oras, inaasahang paiiksiin ng railway ang biyahe sa pagitan ng Maynila at Clark, Pampanga sa 55 minuto.

Pinangunahan ni Transportation Secretary Arturo Tugade ang marking ceremony para sa 5 istasyon ng proyekto sa Marilao at Meycauayan sa Bulacan, pati na sa Valenzuela, Caloocan at Tutuban.

Magtatalaga rin ng mga istasyon sa Solis, Bocaue, Balagtas, Guiguinto, Malolos, Calumpit, Apalit, San Fernando, Angeles, Clark, Clark International Airport, at ang iminumungkahing New Clark City sa Pampanga.

Bahagi ng “Build, Build, Build” infrastructure program ng administrasyong Duterte ang 106-kilometrong railway.

Ani Tugade, 350,000 pasahero ang makikinabang sa unang taon pa lang ng linya.

Members of the cabinet led by Secretary Art Tugade (2nd from L) of the Department of Transportation unveil one of the station markers of the Manila-Clark PNR railways project in Caloocan on Monday. Jonathan Cellona, ABS-CBN News

Popondohan sa pamamagitan ng Official Development Assistance (ODA) mula Japan ang P255-bilyon proyekto.

Magkakaroon ang railway ng 13 train sets na inaasahang tatakbo sa bilis na 120 kilometro kada oras.

Sisimulan ang konstruksyon ng linya sa Setyembre at target na matapos sa huling bahagi ng 2021. -- Ulat ni Angel Movido, ABS-CBN News

Bisitahin ang Patrol.PH para sa iba pang mga balita.