Umabot na sa 23 ang kabuuang bilang ng mga nagpopositibo sa coronavirus disease sa Negros Oriental matapos mahawahan ang isang pulis at kaniyang nobya mula Dumaguete City, sabi ngayong Linggo ng lokal na health officer.

Ayon kay Liland Estacion, assistant provincial health officer, isang 48 anyos na pulis ang dumating sa Dumaguete City noong Hunyo 12 para sa assignment nito.

Nakipagkita rin umano ito sa nobya nito noong parehong araw.

Nagpa-check up ang pulis noong Hunyo 15 dahil sa masamang pakiramdam at kinabukasan ay isinailalim sila ng nobya niya sa swab test, ayon kay Estacion.

Hunyo 19 nang lumabas umano ang resultang positibo ang magkasintahan sa virus.

Ayon kay Estacion, naka-admit sa isang pribadong ospital ang pulis habang naka-home quarantine naman ang nobya dahil ito ay asymptomatic o walang pinapakitang sintomas.

Sinabi ni Estacion na maaaring ang pulis ang nagdala ng virus sa nobya dahil galing itong Cebu.

Sa buong bansa, umabot na sa 29,400 ang kabuuang bilang ng mga nagpopositibo sa COVID-19, base sa tala ng Department of Health noong Sabado. -- Ulat ni Mitch Lipa, ABS-CBN News