ALICIA, Isabela - Agaw-pansin ang mga paso sa bakuran ng pamilya Fabros sa nasabing bayan dahil nakapinta dito ang mukha ng mga doktor at uniformed personnel na kumakatawan sa mga frontliner sa laban sa coronavirus disease 2019 (COVID-19).

Bukod dito, may mga larawan din ng ilang kilalang personalidad gaya ni Pangulong Rodrigo Duterte, Senator Manny Pacquiao, at Kapamilya star Angel Locsin.

Gawa ito ng tattoo artist na si Rey Fabros habang may lockdown gamit ang mga patapong mineral water bottle bilang canvass.

Aniya, pagsaludo at pasasalamat niya ito sa mga frontliner na patuloy na nakikipaglaban sa COVID-19.

"Naisipan ko pong gumawa ng paso at dito iginuhit po ang imahe ng ating mga frontliners, kasama na rin po ang mga taong tumutulong sa ating mga kababayan sa gitna na pandemic na ating kinahaharap sa ngayon, sila po ang naging inspirasyon ko para mabuo po ito," sabi ni Fabros.

Marami pa siyang iginuhit o sketch na sumisimbulo ng katatagan at pagkakaisa ng mga Pinoy.

Nakakamangha rin ang iba pang obra ni Rey gamit ang mga toothpick. Gaya ng portrait ng ilang sikat na celebrity tulad ni Da King Fernando Poe Jr., NBA star Kobe Bryant, at Kapamilya star Vice Ganda.

"Payo ko lang po sa mga kapuwa ko artist, sana po ilabas lang po natin ang ating mga nasa isip na puwedeng gawin at para makabuo tayo ng mas marami pang obra," dagdag niya.

Patuloy na magbibigay ng inspirasyon si Fabros sa publiko lalo na ngayong nahaharap pa rin sa malaking hamon at krisis ang bansa.